هل انقرض القرطاجيون حقا؟

Posted 7 months ago in People and Nations. 625 Views

بقلم: كريم مختار
شنوا إلي صار لسكان قرطاج القديمة خلال وإثر المحرقة إلي تعرضتلها قرطاج؟ قداش كان عددهم؟ ماتوا الكل ولا معظمهم ولا أقلية منهم؟ فما شكون هرب؟ ل

هل انقرض القرطاجيون حقا؟

بعض الأصدقاء سئلوا: "شنوا إلي صار لسكان قرطاج القديمة خلال وإثر المحرقة إلي تعرضتلها قرطاج؟ قداش كان عددهم؟ ماتوا الكل ولا معظمهم ولا أقلية منهم؟ فما شكون هرب؟ لفين هرب؟"


باش نجاوب هنا إذ ربما ناس أخرين يهمهم الموضوع هذا إلي شخصيا نعتبرو هام برشا وعندي جزء كامل عليه في كتابي قرطاج الجمهورية المنسية. اليوم باش نعطي لمحة عامة من غير ماندخل في التفاصيل:


  • أولا، الغلطة إلي طاحوا فيها جل المؤرخين باش مانقولش الكلهم هي كونهم الكل حكاو على قرطاج في سنة 149 إلى سنة 146 قبل الميلاد وكأنها مجرد "مدينة" فقط.. وهذي غلطة شنيعة وحمقاء جدا بصراحة.. قرطاج في الفترة هذيكا ماكانتش "مدينة" بل كانت جمهورية ممتدة من شمال إفريقيا إلى جنوب أوروبا إلى حتى أمريكا. إي، قريت مليح: أمريكا.

  • - "الشعب القرطاجي" ماكانش محصور بين أسوار مدينة قرطاج فقط.. كان منتشر على كافة تراب شمال إفريقيا وأوروبا وكانت فمة مجموعة صغيرة في أمريكا لاهية بحكاية التنقيب على الذهب خاصة.

  • - عدد سكان إلي يحكيوا عليه "المؤرخين الرومان" كان فما شكون يقول 200 ألف وشكون يقول 400 ألف وشكون يقول وصلوا لمليون نسمة.. معناها "المؤرخين" هاذم يكتبوا على هواهم وهوما والطقس.. باهي، علميا، فما معادلة دقيقة إنجموا نحسبوا بيها عدد سكان مجتمع ما بعد فترة زمنية ما ووفقا لمتغيرات دقيقة كيما الوضعية متع الفلاحة عندو وفاش ياكل وقريب ولا بعيد من البحر ولا المحيط ووو... من غير ما نطول عليكم، عدد سكان قرطاج المدينة في القرن الثاني قبل الميلاد كان على الأقل مليون نسمة ولي يحكيوا عليهم الرومان هوما عدد الضحايا متاعهم من موتى وسبايا (إي موش كان العرب يسبيوا) وعبيد.

  • - القرطاجيين إلي كانوا خارج أسوار روما كانوا أضعاف الرقم هذاكا وكانوا معظمهم شمال إفريقيين وإيبيرين (معناها بكلامنا اليوم سبنيور وبرتغال) وفيهم إلي ولا عبد وعاش ولي ولا تابع نوميديا بالسيف عليه ولي حتى بدل إسمو غصبا عنو باش ينجم يعيش فل مجتمع إلي يسميوه "مؤرخينا" اليوم، بحماقة زادة، "قرطاج الرومانية".. نعطيكم دليل صغير ضمن أدلة أخرى على كلامي الصادم هذا: اللغة القرطاجية الكنعانية قعدت موجودة في قرطاج حتى القرن العاشر ميلادي.. معناها عاشت الغزو الروماني متع خمسميات سنة وقعدت موجودة أكثر من قرنين بعد ما جات الدولة الإسلامية.. كان القرطاجيين الكل ماتوا كيما يحكيلنا البعض مالا شكون إلي قعد محافظ على اللغة؟ جماعة بوركينا فاسو؟

  • - إلي صار على القرطاجيين بعد المحرقة كانت رجة نفسية رهيبة وتمت معاملتهم عشرات المرات أسوء من معاملة النازيين لليهود في الحرب العالمية الثانية.. الفرق هو إلي العالم الكل اليوم يعرف الهولوكوست متع اليهود وما يعرفش الهولوكوست الأول في تاريخ البشرية وهو هولوكوست قرطاج..

  • - القرطاجيين إلي في أوروبا نفس الشي صارلهم والدليل على ذلك هو الإبادات العرقية إلي صارت في إيطاليا وإسبانيا وفرنسا واليونان مباشرة بعد طياح قرطاج.. والمسألة مربوطة الكل ببعضها لكن "مؤرخينا" ما يفكروش.. يقراو الكتب ويحفظوا أكهو باش ياخذوا شهادة يعملوها كواترو.
    يظهرلي يزي هكا خاطر هذا منشور موش مقال.. ونتمنى إنو الفكرة وصلت شوية: القرطاجيين عمرهم ما "انقرضوا" لكن ماتوا منهم مئات الالاف في المحرقة، والأخرين يا إما عاشوا عبيد تحت روما، وإلا بدلوا أساميهم وخباوا دياناتهم ولغتهم وتقاليدهم وقعدوا يمارسوا فيها سرا، وفما مجموعات أخرى إلى خرجت كليا من المنطقة ومشات لجزر الكناري وأمريكا ولي إتجهت نحو الشرق..